www.oruneday.it di Giampaolo Ghisu

paolo pischedda

s'emigradu

Canno penso a tie,o bidda mia,

mi 'nde faghet sas lagiamas falare

e m'attristat sa tanta nostalgia.

Annaia cuntentu a tribagliare;

mama,chi fit tantu premurosa

non mi faghiat niente mancare.

Cun sa dulche mirada affettuosa

fia bene pulida e pranciadu

mi faghiat cuntentu in d'ogni cosa.

Inoghe tottu cantu mi est mancadu

de mama e de amigos su cunfortu

dae sa die chi happo emigradu.

Miran su foristeri a oju tortu

cun d'una brutta e oscura mirada

comente chi su babbu l'aeren mortu.

Custa est sa vida de cantos che n'ada

in custas zonas versenne sudore

in chirca de sa triste zorronada.

Calculados de razza inferiora

traditore, ti nana, e famidu;

conservas semper s'antigu rancore.

Est in certos locales proibidu

de bi andare zente italiana,

restat, senza lu cherrer avvilidu

de malu modu sa merce ti dana,

s'annas a comporare petta e pane

ti trattan chin manera disumana.

T'abbadian che unu mariane,

in tottu ti sentis odiadu

pro issos rappresentas unu cane.

Guvernu: cantu male has causadu !

fizzos tuos si che son fuidos

ca no lis has trabagliu procuradu.

inoghe umiliados e pentidos

pro cussos pagos soddos murrunzados

nos semus a ischiavos reduidos.

Custa est sa vida de sos emigrados

pro chie non connoschet custa iscena

dae sos inimigos isfruttados.

lassenne sa fatica in terra anzena

semper cun s'isperanzia 'e Deus

si in bidda den travagliu appena appena

che torro a ue est mama e babbu meu