www.oruneday.it di Giampaolo Ghisu

micheleddu pigliaru

"SOS CAZZIADORES DE SU 61"

Bruno de sos sirvones est terrore

orgogliosu chi paret unu mare

Pietro chin Vittorio risponene.

"A cras manzanu a bi l'organizzare".

Pillareddu lis dat s'avertiscione:

"attenzione  'e no irbagliare".

Tonneddu Carta n'arreat cuntentu

canno l'intennet cussu moghimentu.

S'isquadra de passu accelleradu

fachen vinti chilomitros a s'ora,

su sartu foristeri han trapassadu

e c'han boccadu punta a s'aurora;

b'it su sindacu ch'it ischieradu                                           

armadu de bussile e de pistola,

de lumene e in fattos preferidu

fiore bellu cantu has fioridu.

Chin Satta-Marchi han fattu s'unione

cadiunu los devet saludare

zovaneddu pienu de onore

chi b'est sa pache in sa soziedade,

s'aera ponet a unu muntone

cusse da l'ischit a umbe isparare,

chin su maridu de sa levatrice

com'est passadu vice-direttore.

Donzi colpu chi tirat est sicuru

vinzas a li bucare su cherveddu,

in sa campagna non cheret azzudu

c'hat imparadu dae minoreddu

e Micheleddu tirat a s'iscuru

in messu bi la ponet a s'isteddu,

fachen' iscola a Mario Sannio;

cudd'animale l'hat dadu s' adio.

Da bi l' has fatta bella sa figura

chi ti l'has' ammentare pro continu,

pro comente fis cazzadore primu

su bussile giunchias in secura,

tottu sa die fias in tristura

ca l'hat contadu su Davoli Ginu

chin passione e entusiasmadu

"Oh si deo l' aiapp'isparadu!".

A Zizzu Mula hat' attu sa proposta

chin paraulas pranas e brienne :

"Ca mi che l'has coladu in cudda costa

e l'has vidu sa coda pennulenne!

Si mi l'aias coladu in sa posta

l'aias bidu in terra loddurenne,

e non bi torrat pius a intreu

ca tue l'has isparadu a Bivur Deus".

Canno l'hat postu toccu su catheddu

su corru da bi l'hat isquilladu,

in pettus leat a Borroculeddu,

a s'atter'ala che l'hat bortuladu

e ne giuchiat su coro a toccheddu

ma duttor Pala l'hat risuscitadu

e tanno fiat galu corazzosu

ma su sirvone est chi l'hat dadu addossu.

Duttor Pala l'hat'atta sa promessa:

"Ca tenzo gana de m'ispassiare

chimbanta litros ne devo vocare

e bollos ponzo in supra 'e sa messa

tanno vidimus si la dò sa ressa,

tottu cantos bos devo imbreacare

bastante de ucchidere a sirvone

chi sia mannu, chi sia minore".

A Giannetto Cabiddu bi l'hat nadu:

"Mira sos canes chi son gannitenne,

tue de cazzadore non t' intenne

prite ses goi demoralizzadu"

e i su capu-cazza bi l'hat nadu:

"Mira inoche ti colat currenne,

chin su bussile gal' a caricare

attentu non ti torret a costare".

Tanno n'arribat Peppinu Barracca,

tanno n'arribat Barracca Peppinu,

canno l'hat bidu l'hat attu su tiru

e puru no l'hat attu manca tacca,

inoche non b'hat contu de viacca,

l'ana nadu chi fit unu ciappinu

appena unu gattu hat' ammazzadu

finalmente si ch'est isverginadu.

Duttor Ninu chin ver'appressione

attenzione diat cherrer dare,

chin su bussil' a ripetizione

ma sambene non ressessit a boccare,

pallettones de mela 'e lidrone

issu de cussa devet ausare

e de pulvera ponet sa reina

laddarica de nitra soricchina.

A su baccanu n'arrivat "Su Voe"

subitamente pro ingiuriare:

"Ma custa mi la marco sa 'e oe

chi m'has vattidu pro m'ispassiare,

paragula 'e impinnu chi ti doe

chi non bi torro prus a cazziare,

ca no has mortu sa sue tunnedda

da mi l'has assutada sa padedda".

Tanno ne venit Antoni Galera

"Abbissomeu so vennidu dopo,

no l'azzes cottu galu su merdocco

como chi tenzo sa gana che seda,

a tottu bollu naro bona sera,

dae custa padedda mi ne vocco

e mi facco una bella cassola,

custa mi che la mannico a sa sola".

Giannetto cazziadore misserinu

in sa gita si riet a cossolu

canno s'arreat in messu caminu

bi lu sonamus su pippiriolu,

unu veru mandrone reffinidu

ca proite si vat a boe solu

ca in cazza non bi ponet cura

ca est abituadu a sa vettura.

Su Maresciallu Piras, Piras nana,

c'att'un'arma potente e ispeciale

canno tirat est toccu e campana

prite l'han premiadu in s'isparare,

sa cumpagnia lu tenet a fama

su campione sardu mondiale.

De tottu coro li tocco sa manu

lu videmas promossu capitanu.

Aggiuntu l'amus  Antoni Sordadu

e ottima l'hat'atta sa surpresa

a pieghere de su comitadu

s'attera cumpagnia s'est offessa

ca si n'hat unu mannu ispacchettadu

e l'hat toccadu razione e messa

tottu sa zente l'hat applaudidu

c'hat isparadu e non si l'hat addiddu.

Su paralumene est Borroculeddu

e a lumene si narat Salvatore

in posta l'hat coladu unu sirvone

e mortu l'hat in matta unu porcheddu,

fachet offettu mancari basceddu

de cuddos tiros in precisione

alligru che puzzone du veranu

ca s'arma sua l'est leanne manu.