www.oruneday.it di Giampaolo Ghisu

filippo coccone

abertenzia a sos imbreacones

Ascurtade lettores,

chin pache e chin amore,

bos doe un'abertenzia pro continu

suffrit tantu dolore,

fachenne disonore,

s'omine chi si vennet a su vinu.

Cantu est imbreacu

cumparet de esser macu,

paraula non faeddat in tinu,

ciarrone es faeddanne

e peruna resone cumprennet.

Non cumprennet resone

de peruna pessone

ca est de sentimentos traviadu,

postu in derisione

e isce credenzone

credet de aere premiu leadu.

Cin d'unu coro forte,

chene ne timer morte

paret de aere a tottu superadu,

però est debile e lenu,

si caminat lu rughet unu enu.

Si caminat, trambucat

e si aperit de buca

faeddat'a dognunu istravagante.

Rue,rue che tucat

no ischit ube imbucat

si lu chircana non ghirat in s'istante.

Si carcunu non ghirat in s'istante

si carcunu lu toccat,

frastimat e irrocat,

paraulas de ingiurias infamantes.

Non connoschet parentes

mancari su prus chi ama si presentet.

Ite dispiaghere;

sa poghera muzere,

si mesca est cojuvada e tenet izzos !

De isce no est mere,

si facat su chi cheret,

affligida chin penas e fastizzos.

Isce sichit a annare

chene si issegherare,

no hat de sos affares contipizzos

solu de su zilleri

chi cantu intrat su chelu si li aperit.

Non naro a nò annare

a no s'ispassiare,

ma donzi cossa sa regula cheret

bi n'at de criticare

sos chi solen istare

sedmper in divertimentos e piaghere.

No bi n'at torricontu

e pro cussu in affrontu

arrivana a sas pogheras muzzeres,

dae s'imbreacone

chi contipizzu e cura non si ponet.

No si ponet cura,

ma no est isventura

o disgrazia chi venit'a s'omine

chi cussa est dissigura;

senna abile 'e natura

lu achet tontu e pernu de machine,

ca su binu arcullizzat

a chi non si abizzat

chi abusanne fachet mala fine.

Si regula non b'hat

restat buscia e salude guasta.

Como sos betturelis

de vois crederis

si m'ischin custu s'odiu mi n'hana,

ti lu dana bolentieri

e tue piùs lizeri

cuntentu ca su creditu ti dana,

poi cantu ti citana

ti falat che lanzita

e ti fachen pacare a mala gana

e si non picas prestu

ti convocan in presse a sequestru.

Si naro, non offenno,

pro cussu mi ne astenno

sichide in fattu meu, Azes intessu.

Como tottu cumprenno,

s'avvertenzia renn,

sichide infattu meu, atzes intessu

de jocos, murra e cartas

fachide sa disfatta,

chi non bos capitedas mai in messu,

cussu est su chi arrughinat

e mannat sos benes in rughina.

Ub'est s'imbriacone

ub'est sa cuffusione

cerimonia e briga non bi mancat.

Vana in perdizione

robas e cumones,

pesana in fumu palazzos e tancas;

bisonzat reifrettire

chene li suzzerire

e iscire dae vranca,

ca vennidu chi siat

male est a bi torrare duas bias.  

Avverto sas vazzanas,

sas chi tenides gana

de intrare in su munnu in pache santa.

Si a tie chircana,

s'imbreacu allontana,

ca diaulu dae s'abba santa.

S'imbreacone leas

non ti mancat pelea,

ti sicas dae funnu che pianta

discurre e cussidèra

chi non rugas 'e cussa manera.

Avverto sos vazzanos,

vivedas semper sanos

chin salude comente bos precades,

d'istravizios vanos

istadeche lontanos,

chi prus sanos e fortes bos restades.

Si chircades muzzere,

chin meda piaghere,

bos azzetan e chin liberidade,

si gai non fachides

vagabundos e solos bos morides.