a fizzu meu (Orazio)

Orazio, ue ses, inue abitas,

Custu grande misteriu est dolorosu.

Ue ti chirco,inue mi visitas,

Ue mi giamas che fizzu amorosu?

A ue has cambiadu sa dimora,

pruite dae domo ses fuidu?

O sos aanghelos t'han accollozzidu

In sos binujos de Nostra Signora?

Como des esser cantende sos innos

De sa Madonna, sa bontade sua,

Comente faghen tottu sos pizzinnos

Chi mortu sono a sa edade tua.

Canta sa sinfonia ugualmente

Cun s'Ispiritu Santu e cun sos Santos,

Prega po babbu tou frequente

Chi li potan calmare sos piantos.

Unu prantu cun lagrimas a rios

affannat custa vida dolorosa,

Ca non torras pius prend'amorosa

A ti ninnar'in sos binujos mios.

Non podes assunessi calch'istante

de torrares a domo, fizzu amadu !

pro dare a babbu tou isconsoladu

un'ultimu saludu consolante.

Torra pro visitar'a  mam'in coro,

Visit'a a frade tuos s'innocenzia:

Chi non connoschen sa consiguenzia

de su chi b'est suzzess'in dom' insoro,

Ch'in sas alas biancas gioia mia

A domo tua una visita dese,

Torra pro visitare sa chillia

Ue martirizzad'e mortu sese

T'amment'a  a mama tua 'e sa tita

E sos momentos chi t'hat allatadu;

su chi t'hat babbu tou alimentadu,

donzi cosa ti sia beneita.!

beneitos ti sian sos momentos

C'has passad'in sa nostra cumpagnia,

Beneigat sa vergine Maria

tottu sos graves tuo patimentos.

Beneitas ti sian sas lagrimas

C'a su pallidu vis'hapo versadu,

Beneitos abbrazzos e istimas

E cantos basos t'hapo regaladu,

Beneitu ti siat su terrinu

Chi su baule ch'in dossu possedis,

Beneigas che anghelu divinu

Cantas ojadas a su mundu zedis.

Ed ecco amadu fizzu est terminadu

Custu lamentu 'in su rusticu cantu,

prega pro cantos t'han'accumpagnadu

A sos canzellos de su campusantu.

O fizzu, sos c'accumpanzadu t'hana,

lead'han part'e sos mios turmentos,

sos infinitos ringraziamentos

Lis mando cun bidea sant'e sana !

                                                                                         Febo Davoli  Orune 1949

Unidebos a custa bandiera                                                                                            

e difennide sa suin’importanza                

sas isolas sa nazion’intera                            

formade s’unione frattellanza                    

Cumpattos diffennide s’interessu             

de su vissillu ch’isventolat oe                    

chi lugiughet su entu moe moe                  

caminemus sa vi’e su progressu

Unidebos in paghe unione

pro dare vid’ a s’istamp’ in giornale

chi at bisonzu de sovenzione

Cumpatta italiana sociedade

c’as bisonzu de ider lughe noa

diffunnide sa festa de s’unidade.

                         Febo Davoli