DISTESU IN CUSSU GRANITICU MONTE

SOS TUOS ANTENADOS T’AN FUNDADU

A DOGNI ENTU PARANNE SA FRONTE

SES CHE QUADRU E PITTORE FAMADU

CIRCUNDADU DE ERVAS E FIORES

E DE ROCCAS E BUSCU INGHIRIADU

E NE TI MANCAN SOS VIVOS COLORES

SOS CHI T’AT REGALADU SA NATURA

CA FIAS MERITEVOLE PROMORES

SA ZENTE TUA AMANTE E SA CULTURA

E DE S’ARTE CA EST INTELIGENTE

E POETICA VENA TENET PURA

SOS FIZOS CHI BI AS IN CONTINENTE

EMIGRADOS O FORAS DE S’ISTADU

ORUNE, SEMPRE TI TENEN IN MENTE

TI CONNOSCHEN TOTTUE, FORTUNADU

CA TENES VIVA S’OSPITALIDADE

E N’ES FIERU CHI E IN TENE ES NADU

SU BESTIAME C’ASA IN CANTIDADE

CHI SU TUO OPEROSU PASTORIU

TI RENNET BENISTANTE IN VERIDADE.

D’ONZ’ANNU APENAS CHI TORRA S’ISTIU

S’EMIGRADU ORUNESU DAE LONTANU

TORRAT A TIE, ASU LOGU NADIU

UVE LASSADU B’AT SU PAESANU

SA FAMIGLIA, S’AMICU’ SU PARENTE

PO L’AGATARE E ASTRINGHE SA MANU.

OE BENNIDU MI EST A SA MENTE

CHIN CUSTU MEU MODESTU CANTARE

A NARRERE SU CHI SES’APERTAMENTE

NON TI SI PODET ORUNE NEGARE

S’ONORE CHI T’AS FATTU IN SAS BATTAGLIAS

TENTANNE S’ENEMIGU E CUNTRASTARE

CONTRA CUSSOS IMPAVIDU T’ISCAGLIAS

IN SAS MONTAGNAS DE S’ALTU TRENTINU

PO CHE TORRARE I SEGUS SAS CANAGLIAS

REMIGIO GATTU E LANFRANCO LATINU

S’ARGENTO T’AN DONADU A BONU CORO

E LU TENES A BANTIDU LADINU

E BUSTIANU SATTA E NUORO

CUN SA SUA POESIA ARMONIOSA

TI A DESCRITTU CHE UNU TESORO,

T’A NADU, PARES TALAMU DE ISPOSA

UE DANZANA IN TUNNU SAS SIRENAS

E TI CANTAN CUN BOGHE MAESTOSA

DELEDDA T’AT ISCRITTU IN SAS ISCENAS

CULUMBOS SEZIS E ISPARVIEROS

CHI DAZES BOLU A SAS TERRA ANZENAS

SOS CHI TENEN SOS DONOS CHE OMERO

DE ORUNESOS TI ANA CANTADU

CHIN CANTICOS SUAVES E FIEROS

TANTU SOS CHI AIAS IN PASSADU

CANTU SOS CHI BI TENES IN PRESENTE

T’ESALTAN SU VALORE MERITADU.

DAE TEMPOS ANTIGOS, MEA ZENTE

SEMPRE MANTESU A SAS TRADIZIONES

CHI VALANZADU AS DIRETTAMENTE

DAE SOS TUOS AVOS CA IN PERSONES

ORGOGLIOSOS E FORTES DE CARATTERE

E DUROS CHE GRANITICOS CONTONES

CHI SEMPRE PRONTOS FIANA A CUMBATTERE

CONTRA DE SOS’ANTIGOS INVASORES

CHI SA BARBAGIA CHERIANA ABATTERE.

CANNO ENIN SAS FESTAS SOS PASTORES

IN SOS ZILLERIS O IN SA PIATTA

CHI INTONAN SOS MITICOS TENORES

SA PERSONE VICINA CHI SI AGATTA

ISCURTAT ALLERADU A BUC’APERTA

CA SU CUNSONU A S’ORIJA EST ADATTA

NO ES NEMMANCU UNA NOA ISCOPERTA

S’AS DEGHESSETTE PRIDES CUNSACRADOS

CA PO SA FEDE SA JANNA AS APERTA

SI PO SA RELIGIONE SUN VOTADOS

CUSTOS MINISTROS UMILES DE DEU

DA ISSU ETOTTU SUN RICUMPENSADOS

BORTAS AS TENTU PURU CALCHI NEU

E CUN DOLORE E TANTU SACRIFIZIU

AS SUPERADU CUSSU TEMPUS FEU

DE TANTOS AS SUBIDU SU GIUDIZIU

CUN CRITICAS PESANTES E OFESA

ETTANNETICHE A SU PRECIPIZIU

TUE PERO’ CA TENES FIERESA

ORUNE, E TENES ALTU SENTIMENTU

MAI ALZADU SA MANU AS A SA RESA

E NE MAI AS USADU TRADIMENTU

A UN’AMICU O A SU PAESANU

PO CUSS MENZUS MORTU VORTAS CHENTU

ANZIS TUE SE SEMPERE A SA MANU

TRATTAS CHIN TOTTU IN MODU GIOVIALE

E S’IRONIA AS IN PRIMU PIANU

SES’ISCHERZOSU CHE SU CARNEVALE

CA SU TEMPUS SI COLAT PURU GAI

A BORTAS TRA SU BENE E I SU MALE

MA COMO TI SALUDO CA ORAMAI

CUSTU LIBERU CANTU INOGHE FRIMO

E ZEO PURU, ORUNE, SO DE GAI

PIUS LONTANU SO PIUS T’ISTIMO.

GROTTE S.STEFANO (VT), 25-06-2002

C’AMUS TOCCADU CHIMBANTA VERANOS

BOS AUGURO IN POETICU PANNU

ATEROS CHIMBANTANNOS SEMPRE SANOS

IN ALLEGRIA PASSEDAS IN TERRA

S’ES CUSSA SA DURADA E SOS UMANOS

DE SU TRABAGLIU AFRONTANNE SA GHERRA

OE NOS’AGATAMUS DIVIDIDOS

FORA DAE S’AMADA SARDA TERRA

MEDAS SI SUNU A S’ESTERO PARTIDOS

ATTEROS PREFERIDU AN S’ISTIVALE

E INIE SI SUNU ISTABILIDOS

COMENTE A MIE PASTORE PREDALE

APPO CHI TRASTOS E ROBA BRINCADU

SU MARE PO SA TERRA LAZIALE

DATU CHI SA SARDIGNA MAI A DADU

RISORSAS IN SU CAMPU A SU PASTORE

PO LU MANTENNERE A ISSA LIGADU

EPPURU A T’ESSER FIZU M’EST’ONORE

E SEMPERE APO A TIE RISERVADAS

IN CORO MEU FIAMMAS D’AMORE

COMENTE TOTTU CUDDAS DISTERRADAS

PERSONAS CHI IN SA TERRA LONTANA

IN CORO A TIE SEMPRE SUN LIGADAS

MA EST ABERU, SA VIDA EST ISTRANA

A BORTAS CHI BI PENSO M’ADDOLORIT

PO COMENT’ANNAT SA ZENIA UMANA

IN SA IDDA NATIA SI FIORIT

PUSTIS CHI NASCHET DA MATERNU SINU

MA MAI S’ISCHIT INUE SI MORIT

DOGNUNU PREFISSADU AT SU DESTINU

E SENZA MAI ISCHIRE SU SEGRETU

PISTAT IN VIDA S’OSCURU CAMINU

E MAI NOIS IN PERUNU TRETU

CHI LA CHIRCHEMAS PURU NOTTE E DIE

DE SICURESA AGATAMUS SU GHETU

FEDALES, SEMUS COMO A MESUDIE

SU MANZANU CHI EST UN’AURORA

PASSADU L’AMUS DE GOI O GASIE

MA A CUST’EDADE B’AT FORZAS ANCORA

PO PODERE AFRONTARE CALCHI IMPICCIU

C’ANIMU CHIN CHERVEDDU B’A TUTORA

E ISMENTINNE CUDD’ANTIGU DICCIU

CHI NAT, CHIE INTRAT IN SOS ANNO ANTA

AT FINIDU OGNI SOGNU OGNI CAPRICCIU

E ISA CLASSE NOSTRA TOTTU CANTA

ES VERAMENTE DIGNA E TANTU ONORE

CA DE FRUTTOS ES RICA UNA PIANTA

TANTOS AN PREFERIDU SU PASTORE

ARTE NOBILE BELLA ANTIGA E SANA

CH’ES DE SUPRAVIVENZA SU MOTORE

TANTOS CH’INVECE ISTUDIADU ANA

IN ISCOLAS C’AFFOGAN S’IGNORANZA

DE INTELLETUALES TIMBRU DANA

TENEN DE SU LIMBAZU PADRONANZA

MEICOS, INZEGNERIS, AVVOCCADOS

E IN S’OPERA AN GRIDU D’ESULTANZA

SEMPER’ONESTOS, BONOS, EDUCADOS

SIGHIMUS SU TRAGITTU NATURALE

SU CHI E SU RESTU SEMUS SEMPRE ISTADOS

SOS CHI TENIDES VIDA CONIUGALE

E AZES FIZOS IN SU OSTRU NIDU

CRESCAN SANOS IMMUNES DAE MALE

E NEREN, CANNO LIS BENIT PEDIDU

CHIN PUNTAS DE ORGOGLIU E SENTIMENTOS

BABBU MEU SU MILLE E NOIGHENTOS

DE SU CHIMBANTA BATORO E NASCHIDU

COMO C’APO ATTU SA CONCLUSIONE

DE SA TERZINA, CHI BENE BOS PINGHET

GENEROSU SA MANU BOS ASTRINGHET

ANZELINU, SU IZU E BAILLONE.

GROTTE S.STEFANO, 2004

ANGELINO CONTENA

VI MANDO QUESTA POESIA AUGURANDO SALUTE A TUTTI I MIEI COETANEI DI ORUNE.